ⴰⵎⵎⴰⵙ ⵏ ⵢⴰⵜ ⵜⴱⵔⴰⴷⵜ ⵍⵍⵉ ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵢⵃⵊⵊⴰⵊⵏ ⴰⴷ ⴷ ⵍⵍⵉ ⵢⵖⵔⴰ, ⴰⵙⵙ ⵏ ⵓⴽⵡⴰⵙ ⴳ ⵓⵣⴰⴳⵯⵣ ⵏ ⵕⵕⴱⴰⵟ ⵙⵍⴰ, ⵎⴰⵙⵙ ⴰⵃⵎⴰⴷ ⵜⵜⴰⵡⴼⵉⵇ, ⴰⵎⴰⵡⵙⴰⵙ ⵏ ⵍⵃⴰⴱⵓⵙ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ, ⴳ ⵓⵣⵎⵣⵣⵓ ⵏ ⵓⴷⴷⵓ ⵏ ⵜⵔⴰⴱⴱⵓⵜⵉⵏ ⵉⵜⵜⵓⵙⵙⵓⴼⴹⵏ ⵉⵎⵣⵡⴰⵔⵏ ⵙ ⵍⵃⵊⵊ, ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵢⵃⵊⵊⴰⵊⵏ ⴰⴷ ⴳⵉⵏ ⴳ ⵉⵎⵙⵇⴰⴷⵏ ⵉⴼⵓⵍⴽⵉⵏ ⵏ ⵜⵎⴰⵣⵉⵔⵜ ⵏⵏⵙⵏ ⴷ ⴰⴷ ⴼⴽⵉⵏ ⵢⴰⵜ ⵜⴰⵡⵍⴰⴼⵜ ⵉⵅⴰⵜⴰⵔⵏ ⵅⴼ ⵍⵎⵖⵔⵉⴱ ⵓⵍⴰ ⵜⴰⵡⴰⴷⴰ ⵏⵏⵙ ⴳ ⵓⵖⴰⵔⴰⵙ ⵏ ⵜⵣⵣⵉⴳⵣⵜ ⴷⴷⵓ ⵏ ⵜⵏⵙⵙⵉⵅⴼⵜ ⵉⴼⴰⵡⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴳ ⵓⵣⵎⵣⵣⵓ ⵢⴰⴷ, ⵉⵙ ⵉⵅⵚⵚⴰ ⴰⴷ ⵣⵔⴽⵏ ⵉⵃⵊⵊⴰⵊⵏ ⵉⵙⵡⴰⵍⴰⵏ ⴷ ⵉⵙⵡⴰⵔⵏ ⵍⵍⵉ ⵜⴹⴼⵕ ⵜⵎⴰⵡⴰⵙⵜ ⵏ ⵍⵃⴰⴱⵓⵙ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴰⴼⴰⴷ ⴰⵢⵜⵏ ⵜⴼⴽ ⵜⵉⵎⵙⵓⵜⴰⵍ ⵏ ⵢⴰⵏ ⵉⵎⵏⵉⵀⴰⵏ ⴰⵅⴰⵜⴰⵔ ⴰⵎⵎⴰⵙ ⵏ ⴰⵎⵓⴷⴷⵓ ⵏⵏⵙⵏ ⴳ ⵍⵃⵊⵊ.
ⵉⵔⵏⵓ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵙ ⵜⵚⵚⵉⴼⴹ ⵜⵎⴰⵡⴰⵙⵜ ⵙ ⵍⵃⵊⵊ ⵎⵏⵏⴰⵡ ⵏ ⵜⵔⴰⴱⴱⵓⵜⵉⵏ ⵉⵙⵎⴰⵏⵏ ⵉⵙⴰⵜⵉⵏ ⵙⴳ ⵍⵄⵓⵍⴰⵎⴰ ⴷ ⵉⴹⴱⵉⴱⵏ ⴷ ⵉⵏⵙⵎⴰⴳⴰⵍⵏ ⵉⴳⵔⴰⵣⵏ ⴷ ⵜⵎⵖⴰⵔⵉⵏ, ⵍⵍⵉ ⵔⴰⴷ ⵉⴹⴼⵕ ⵜⴰⴷⵓⵙⵉ ⵏ ⵉⵃⵊⵊⴰⵊⵏ, ⵓⵍⴰ ⵢⵎⵙⵙⵓⴳⵓⵔⵏ ⵍⵍⵉ ⵔⴰⴷ ⴰⵜⵏ ⵉⴼⴽ ⴽⵔⴰ ⵢⴳⴰⵜ ⵜⵏⴰⴼⵓⵜ ⵍⵍⵉ ⵜⵏ ⵉⵅⵚⵚⴰⵏ.
ⵉⵖⵔⴰ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⵉⵃⵊⵊⴰⵊⵏ ⴰⴷ ⵣⵔⴽⵏ ⵜⴰⵔⴰⵜⵉⵏ ⵉⵎⴰⵜⴰⵢⵏ ⴰⴼⴰⴷ ⵉⴼⴰⵍⴽⵉ ⵡⵣⵔⵔⵓⵢ ⵏ ⵍⵃⵊⵊ, ⵖⵉⴽ ⵍⵍⵉ ⵏⵏⴰⵏ ⵉⵏⴱⴰⴹⵏ ⵏ ⵜⴳⵍⴷⵉⵜ ⵜⴰⵄⵕⴰⴱⵜ ⵜⴰⵙⴰⵄⵓⴷⵉⵜ ⵜⵓⵍⵜⵎⴰⵜ, ⴰⴼⴰⴷ ⴰⵡⵉⵏ ⵉⵃⵊⵊⴰⵊⵏ ⵢⴰⵏ ⴰⵙⵏⵓⴱⴳ ⵉⵅⴰⵜⴰⵔⵏ ⵖⵉⴽ ⵍⵍⵉ ⵔⴰⵏ ⵉⵏⴹⵏ ⵢⴰⵜⵜⵓⵢⵏ ⵏ ⵓⵅⴷⴷⴰⵎ ⵏ ⵙⵏⴰⵜ ⵜⵎⵣⴳⴰⴷ ⵜⵉⵛⴰⵔⵉⴼⵉⵢⵏ, ⴰⴳⵍⵍⵉⴷ ⵙⴰⵍⵎⴰⵏ ⴱⵏ ⵄⴱⴷⵍⵄⴰⵣⵉⵣ.
ⴱⵍⴰ ⵏ ⵖⵉⴽⴰⵏⵏ, ⵉⵖⵔⴰ ⴱⴰⵀⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵍⵃⵓⵊⵊⴰⵊ ⴰⴷ ⴰⵊⵊⵉⵏ ⴽⵔⴰ ⵢⴳⴰⵜ ⵜⵎⵉⵔⵉⵅⴼⵜ ⴷ ⴰⴷⴷⴰⴷ ⵓⵔ ⵉⵄⴷⵉⵍⵏ ⴷ ⴰⴷ ⵎⵍⵉⵏ ⴰⵎⵙⵓⵔⵓⴼ ⴷ ⵓⵎⵢⴰⵡⴰⵙ ⴰⴼⴰⴷ ⵍⴽⵎⵏ ⵙ ⵓⵡⵜⵜⴰⵙ ⴰⴽⴽⵯ ⵉⵄⵍⴰⵏ ⵍⵍⵉ ⵢⵔⴰ ⴽⵔⴰ ⵢⴳⴰⵜⵜ ⴰⵃⵊⵊⴰⵊ, ⵎⴰⵢⴰⴷ ⵉⴳⴰⵏ ⴰⴷ ⵇⵕⵕⴱⵏ ⵙ ⵙⵉⴷⵉ ⵕⴱⴱⵉ ⴷ ⴰⴷ ⵜ ⵄⴱⴷⵏ, ⴷ ⴰⴷ ⵔⵣⴼⵏ ⵍⵇⴱⵕ ⵏ ⵓⵕⵇⵇⴰⵚ ⵙⵉⴷⵏⴰ ⵎⵓⵃⵎⵎⴷ, ⴷ ⴰⴷ ⴷⵄⵓⵏ ⴳ ⵓⴷⵔⴰⵔ ⵏ ⵄⴰⵕⴰⴼⴰ ⴰⴷ ⵉⵏⵚⵕ ⵙⵉⴷⵉ ⵕⴱⴱⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷ ⴰⴷ ⵉⵃⴼⴹ ⵜⵡⴰⵛⵓⵏⵜ ⵜⴰⴳⵍⴷⴰⵏⵜ ⵓⵍⴰ ⵜⴰⵎⴰⵣⵉⵔⵜ ⵏ ⵍⵎⵖⵔⵉⴱ.