ⵔⴰⴷ ⵜⵜⵓⵙⴽⴰⵔ ⵜⵖⵔⵎⵜ ⵏ ⵜⵥⵓⵕⵉ ⴷ ⵜⴷⵍⵙⴰ ⵢⴰⴷ, ⵍⵍⵉ ⵢⵙⵎⴰⵏⵏ ⵉⵙⵙⴰⵔⵓⵏ ⵏ ⵓⵙⵜⵓⴳ ⵏ 350 ⴰⵎⵍⵢⵓⵏ ⵏ ⴷⴷⵔⵀⵎ, ⴰⵎⵎⴰⵙ ⵏ ⵢⴰⵏ ⵓⴳⵣⵣⵓⵎ ⵏ ⵡⴰⴽⴰⵍ ⵉⵙⵎⴰⵏⵏ 3.6 ⴰⵀⵉⴽⵜⴰⵔ.
ⵔⴰⴷ ⵢⵉⵍⵉ ⴳ ⵜⵖⵔⵎⵜ ⵏ ⵜⵥⵓⵕⵉ ⴷ ⵜⴷⵍⵙⴰ, ⵙⵍⴰⵡⴰⵏ ⴰⴽⴽⵯ, ⵢⴰⵏ ⵓⵎⵣⴳⵓⵏ ⴰⵎⵇⵕⴰⵏ ⵉⵟⵟⴰⴼⵏ ⵜⵉⵥⵉⴹⵕⴰ ⵉⵍⴽⵎⵏ 1.000 ⴰⵏⵙⴰ, ⴷ ⵢⴰⵏ ⵓⵙⵉⵏⴰⴳ ⵏ ⵓⵣⴰⵡⴰⵏ, ⴷ ⵢⴰⵜ ⵜⴰⴷⴷⴰⵔⵜ ⵏ ⵉⴷⵍⵉⵙⵏ, ⴷ ⵢⴰⵜ ⵜⵙⵏⵏⵉⵖⵜ ⵏ ⵜⵣⵓⵕⵉ ⵜⴰⵇⴱⵓⵔⵜ, ⴷ ⵢⴰⵜ ⵢⴰⴹⵏⵉⵏ ⵏ ⵡⴰⵜⴰⵢ, ⴷ ⵢⴰⵏ ⵓⵙⵉⵔⴰⵢ ⵏ ⴱⵕⵕⴰ ⵉⵥⴹⴰⵕⵏ ⴰⴷ ⵉⵙⵏⵓⴱⴳ ⵍⴰⵃⵡⴰⵍ ⵏ 30.000 ⵓⴼⴳⴰⵏ, ⴷ ⵢⴰⵏ ⵓⵙⴱⵉⴷ ⴷⴷⵓ ⵡⴰⴽⴰⵍ ⵏ ⵜⵀⵉⵔⵉⵏ.
ⵔⴰⴷ ⵉⵜⵜⵓⵙⴽⴰⵔ ⵓⵙⵏⵜⵉ ⵢⴰⴷ ⴳ ⵓⵣⵎⵣⵣⵓ ⵏ 48 ⴰⵢⵢⵓⵔ ⴳ ⵓⵙⴰⵜⵉ ⵏ ⵜⴷⵔⴰⵡⵜ ⵉⵙⵎⴰⵏⵏ ⵜⵎⴰⵡⴰⵙⵜ ⵏ ⵓⴳⵏⵙⵓ (130 ⴰⵎⵍⵢⵓⵏ ⵏ ⴷⴷⵔⵀⵎ), ⴷ ⵜⵎⴰⵡⴰⵙⵜ ⵏ ⵜⴷⵎⵙⴰ ⴷ ⵏ ⵓⵣⵕⴼ ⴷ ⵍⵉⵚⵍⴰⵃ ⵏ ⵜⵎⵙⵙⵓⴳⵓⵔⵜ (50 ⴰⵎⵍⵢⵓⵏ), ⴷ ⵜⵎⴰⵡⴰⵙⵜ ⵏ ⵜⵏⴼⵍⴰⵃⵜ ⴷ ⵜⴳⵎⵔⵜ ⵜⴰⵢⵍⵍⴰⵏⵜ ⴷ ⵜⵉⴳⵎⵉ ⵜⴰⴼⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵜ (ⴰⵏⵙⴰ ⵏ ⵜⵚⴽⴰⵡⵉⵏ), ⴷ ⵜⵎⴰⵡⴰⵙⵜ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵥⴽⴰⵡ ⴷ ⵜⵣⴷⵖⵜ ⴷ ⵜⵙⵔⵜⵉⵜ ⵏ ⵜⵖⵔⵎⵜ (50 ⴰⵎⵍⵓⵏ ⴷⴷⵔⵀⵎ), ⴷ ⵜⵎⴰⵡⴰⵙⵜ ⵏ ⵜⴷⵍⵙⴰ ⴷ ⵜⵉⵄⵄⵓⵔⵎⴰ ⴷ ⵜⵓⵏⵏⵓⵏⵜ (60 ⴰⵎⵍⵢⵓⵏ ⵏ ⴷⴷⵔⵀⵎ), ⴷ ⵓⵙⵙⵇⵉⵎ ⵏ ⵜⵎⵏⴰⴹⵜ ⵏ ⵎⵕⵕⴰⴽⵯⵛ ⴰⵙⴼⵉ (60 ⴰⵎⵍⵢⵓⵏ ⵏ ⴷⴷⵔⵀⵎ).
ⴳ ⵓⵣⵎⵎⵣⵓ ⴷⵖ, ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⴼⵓⴳⵍⴰ ⵏ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⵏ ⵓⵣⵔⵉⴼ ⵉⵥⵍⵉⵏ ⵅⴼ ⵓⵙⵏⵜⵉ, ⵍⵍⵉ ⵢⵙⴳⵎⴹ ⵖⵉⴼⵙ ⵎⴰⵙⵙ ⵄⴱⴷ ⵍⵡⴰⴼⵉ ⵍⴼⵜⵉⵜ, ⴰⵎⴰⵡⵙⴰⵙ ⵏ ⵓⴳⵏⵙⵓ, ⴷ ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵣⵕⴼ ⴷ ⵍⵉⵚⵍⴰⵃ ⵏ ⵜⵎⵙⵙⵓⴳⵓⵔⵜ, ⴷ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴳⴰⵏⵉⵏ, ⴷ ⵎⴰⵙⵙⴰ ⵏⵣⵀⴰ ⴱⵓⵛⴰⵔⴱ, ⵜⴰⵎⴰⵡⵙⴰⵙⵜ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵥⴽⴰⵡ ⴷ ⵜⵣⴷⵖⵜ ⴷ ⵜⵙⵔⵜⵉⵜ ⵏ ⵜⵖⵔⵎⵜ, ⴷ ⵎⴰⵙⵙ ⵍⵃⵙⵏ ⵄⴱⵢⴰⴱⴰ, ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵜⵉⵄⵄⵓⵔⵎⴰ ⴷ ⵜⵓⵏⵏⵓⵏⵜ ⴰⵎⵙⵉⵡⵍ ⵙ ⵉⵙⵎ ⵏ ⵜⵏⴱⴰⴹⵜ.
ⵙⴳⵎⴹⵏ ⵙⵓⵍ ⵅⴼ ⵜⵎⵢⵢⴰⵇⴰⵏⵜ ⴰⴷ ⵎⴰⵙⵙ ⴽⴰⵔⵉⵎ ⵇⵙⵙⵉ ⵍⵃⵍⵓ, ⵍⵡⴰⵍⵉ ⵏ ⵜⵎⵏⴰⴹⵜ ⵏ ⵎⵕⵕⴰⴽⵯⵛ-ⴰⵙⴼⵉ, ⴰⵏⴱⴰⴹ ⵏ ⵜⵏⴱⴹⴰⵢⵜ ⵏ ⵎⵕⵕⴰⴽⵯⵛ, ⴷ ⵎⴰⵙⵙ ⴰⵃⵎⴰⴷ ⴰⵅⵛⵉⵛⵏ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵎⵏⴰⴹⵜ ⵏ ⵎⵕⵕⴰⴽⵯⵛ-ⴰⵙⴼⵉ, ⴷ ⵎⴰⵙⵙ ⵄⴰⴷⵉⵍ ⵍⵎⴰⵍⴽⵉ, ⴰⵏⴱⴱⴰⴹ ⵏ ⵜⵙⴳⴰ ⵏ ⵜⵚⵚⵓⵕⵜ.
ⴷⴼⴼⵉⵔ ⴰⴷ, ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴰⵕⵥⵥⵓⵎ ⵏ ⵓⴷⴷⵉⵙ ⵓⵙⴷⵉⴼ ⵏ ⵜⵎⴳⵓⵔⵉ ⵜⴰⵇⴱⵓⵔⵜ ⵏ ⵜⵚⵚⵓⵕⵜ ⵙ ⵓⵙⵜⵓⴳ ⵉⵙⵎⴰⵏⵏ 18.5 ⴰⵎⵍⵢⵓⵏ ⵏ ⴷⴷⵔⵀⵎ.
ⵔⴰⴷ ⵉⴷⵔⵓ ⵡⵙⵏⵜⵉ ⵢⴰⴷ ⴳ ⵓⴼⴰⵔⴽ ⵏ ⵜⵣⵓⵍⵉⵏ ⵍⵍⵉ ⵥⴹⴰⵕⵏ ⴰⴷ ⵓⵔ ⵇⵇⵉⵎⵉⵏ, ⴷ ⴳ ⵓⵙⵓⵜⴳ ⵏ ⵜⵙⵢⴰⴼⵓⵜⵉⵏ ⵜⵉⴷⵖⵔⴰⵏⵉⵏ, ⴷ ⵓⵙⵜⵓⴳ ⵏ ⵜⵎⴷⵢⴰⵙⵜ ⵏ ⵓⵏⴰⵡ, ⵎⴰ ⵔⴰⴷ ⵉⵙⵙⵖⵍⵉ ⴰⵙⵖⵏ ⵏ ⵜⵎⵖⴰⵔⵉⵏ ⵉⵙⴱⵖⵓⵔⵏ ⴰⵔ 50%.
ⵉⵍⵍⴰ ⴳ ⵓⴷⵉⵙ ⴰⵎⴰⵢⵏⵓ ⴰⴷ, ⵍⵍⵉ ⵢⵜⵜⵓⵚⴽⴰⵏ ⴳ ⵓⴳⵣⵣⵓⵎ ⵏ ⵡⴰⴽⴰⵍ ⵉⵍⴽⵎⵏ 2.355 ⴰⵎⵉⵜⵔⵓ ⴰⵎⴽⴽⵓⵥ, ⵢⴰⵏ ⵓⵎⵎⴰⵙ ⵏ ⵓⵙⵖⵔⵜ ⴰⵣⵣⵓⵍⴰⵏ ⵏ ⵜⵥⵓⵕⵉ ⵏ ⵜⵣⵣⵓⵍⵉⵏ ⵏ ⴽⴽⵓⵥ ⵜⵙⴰⵡⵔⵉⵏ ⵜⵣⵣⵓⵍⴰⵏⵉⵏ ⴷ ⴽⵕⴰⴹ ⵜⵣⵇⵇⴰⵏ ⵏ ⵓⵙⵎⵓⵜⵜⴳ, ⴷ ⵢⴰⵜ ⵜⵣⵇⵇⴰ ⵏ ⵜⵙⵏⵎⵍⴰⵢⵜ, ⴷ 20 ⵜⵙⴰⵡⵔⵜ, ⴷ ⵙⴰ ⵏ ⵉⵏⵙⴰⵏ ⵏ ⵓⴼⵙⴰⵔ (ⵍⵄⵕⵄⴰⵕ, ⵜⵉⵣⵓⵣⴰⴼ "ⴷⴷⴽ ⵚⵚⵡⵉⵕⵉ", ⵕⵕⴰⴼⵢⴰ, ⵜⵉⴳⵏⵉ ⵜⴰⵇⴱⵓⵔⵜ, ⵜⵎⴳⵓⵔⵉⵏ ⵏ ⵊⵊⵍⴷ, ⵉⵎⴰⵙⵙⴰⵏ ⵏ ⵜⵣⴰⵡⴰⵏⵜ, ⴷ ⵉⵢⴰⴼⵓⵏ ⵏ ⵡⴰⴽⴰⵍ).