ⴳ ⵓⵣⵎⵎⵣⵓ ⴷⵖ, ⵉⵙⵏⵓⴱⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵍⵡⴰⵍⵉ ⵏ ⴱⴰⵏⴽ ⵍⵎⵖⵔⵉⴱ, ⵎⴰⵙⵙ ⵄⴱⴷⵍⵟⵟⵉⴼ ⵊⵊⵡⴰⵀⵔⵉ, ⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⴰⵣⵣⵓⵍⴰⵏ ⵏ ⵉⴱⴰⵏⴽⵏ ⵏ ⵍⵎⵖⵔⵉⴱ, ⵎⴰⵙⵙ ⵄⵜⵎⴰⵏ ⴱⵏⵊⵍⵍⵓⵏ, ⴷ ⵉⴼⴽⴰ ⵎⴰⵙⵙ ⴱⵏ ⵛⵄⴱⵓⵏ ⵜⴰⵏⵜⴰⵎⵜ ⵉⵥⵍⵉⵏ ⵙ ⵓⵖⴰⵡⴰⵙ ⴰⴷ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⴷⴼⴼⵉⵔ ⴰⴷ, ⴷ ⴳ ⵢⴰⵜ ⵜⴼⵓⴳⵍⴰ ⴳ ⵜⵣⵇⵇⴰ ⵏ ⵓⴷⴰⴱⵓ, ⵉⵖⵕⴰ ⵡⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ ⵢⴰⵜ ⵜⵙⴳⵓⵔⵉ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵍⵍⵉⵖ ⵉⵙⴷⴷⵉⴷ ⵎⴰⵙ ⵖⵉⴽ ⵍⵍⵉ ⵢⵏⵏⴰ ⵓⵙⵍⴳⴰⵏ ⵏ ⵓⵥⵕⴼ ⵏ ⵓⵙⴳⴳⵯⴰⵙ ⵏ 2020, ⵉⴼⴼⵖ ⵢⴰⵏ ⵓⵎⵉⴹⴰⵏ ⵏ ⵉⵙⴽⴽⵉⵏ ⵉⵥⵍⵉⵏ ⵙ "ⵜⴼⵏⵉⵇⵜ ⵏ ⵓⵏⵏⴰⵍ ⵏ ⵓⵥⵕⴼ ⵏ ⵜⵙⵏⵜⴰⵢⵉⵏ ⵏ ⵜⵎⵙⵙⵏⵜⵉⵏ", ⵍⵍⵉ ⵢⵙⵎⴰⵏⵏ 6 ⵏ ⵉⵎⵍⵢⴰⵕⵏ ⵏ ⴷⴷⵔⵀⵎ ⴰⵎⵎⴰⵙ ⵏ 3 ⵉⵙⴳⴳⵯⴰⵙ ⴳ ⵓⵙⴰⵜⵉ ⵏ ⵜⴷⵔⴰⵡⵜ ⴳⵔ ⵓⵡⴰⵏⴽ ⴷ ⵉⴳⵔ ⴰⴱⴰⵏⴽⵉ, ⵎⴰ ⵢⴰⴷ ⵉⴱⵉⴷⴷⵏ ⵅⴼ ⵜⴰⵙⵉⵍⴰ ⵏ ⵜⵉⴽⴽⵉ ⵏ ⵓⵡⴰⵏⴽ ⵏ 3 ⵏ ⵉⵎⵍⵢⴰⵕⵏ ⵏ ⴷⴷⵔⵀⵎ ⴷ ⵏ ⵉⴳⵔ ⴰⴱⴰⵏⴽⵉ ⵏ 3 ⵉⵎⵍⵢⴰⵕⵏ ⵏ ⴷⴷⵔⵀⵎ.
ⵉⵏⵏⴰ ⵎⴰⵙⵙ ⴱⵏⵛⵄⴱⵓⵏ ⵎⴰⵙ ⵜⵎⴰⵡⴰⵙⵜ ⵔⴰⴷ ⵜⵡⵓⵔⵉ ⴳ ⵓⵙⴰⵜⵉ ⴷⵖ ⴷ ⴱⴰⵏⴽ ⵍⵎⵖⵔⵉⴱ ⴷ ⵉⴳⵔ ⴰⴱⴰⵏⴽⵉ ⵅⴼ ⵢⴰⵜ ⵜⵙⵔⵜⴰⵏⵜ ⵉⵟⵟⴰⴼⵏ ⵜⵉⵔⴰⵜ ⵉⵎⵇⵇⵓⵕⵏ, ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⴳⴳⵔⵏ ⵉ ⵡⵙⵙⵔⵅⵓ ⵏ ⵉⵙⴽⴽⵉⵏ, ⴷ ⵓⵙⵙⵓⵀⵍ ⵏ ⵜⵎⵙⵓⵜⵏⵏ ⵏ ⵜⵏⴼⵔⵓⵜ ⵙ ⵓⴽⴽⵙ ⵏ ⵜⵏⴼⵔⵓⵜⵉⵏ ⵜⵉⴼⴳⴰⵏⵉⵏ, ⴷ ⵓⵙⵓⴳⴳⵣ ⵏ ⵡⴰⵜⵉⴳ ⵏ ⵓⵕⵟⵟⴰⵍ, ⵉⵏⵏⴰ ⵙⵓⵍ ⵎⴰⵙ ⵓⵖⴰⵡⴰⵙ ⴰⴷ ⵔⴰⴷ ⵉⴷⵔⵓ, ⴽⵔⴰ ⵢⴳⴰⵜⵜ ⵓⵙⴳⴳⵯⴰⵙ, ⵙ ⴰⵙⵓⴼⴼⵖ ⵏ ⵍⴰⵃⵡⴰⵍ ⵏ 27.000 ⵏ ⵓⵣⵎⵣ ⵏ ⵜⵡⵓⵔⵉ ⴰⵎⴰⵢⵏⵓ ⴷ ⵓⵎⵓⵏ ⵉⵣⴰⵢⴷⵏ ⴷ 13.500 ⵜⵎⵙⵙⵏⵜⵉⵜ.
ⴳ ⵜⵙⴳⴰ ⵏⵏⵙ, ⵉⵏⵏⴰ ⵍⵡⴰⵍⵉ ⵏ ⴱⴰⵏⴽ ⵍⵎⵖⵔⵉⴱ, ⵎⴰⵙⵙ ⵄⴱⴷⵍⵍⵟⵉⴼ ⵊⵊⵡⴰⵀⵔⵉ, ⴳ ⵢⴰⵜ ⵜⵙⴳⵓⵔⵉ ⴳ ⵓⵣⵎⵎⵣⵓ ⵢⴰⴷ, ⵎⴰⵙ ⵉⵙⴽⵔ ⵍⴱⴰⵏⴽ ⴰⵎⴰⵙⵙⴰⵏ, ⴳ ⵓⵙⴰⵜⵉ ⵏ ⵓⵣⵣⵉⴳⵔ ⵏ ⵓⵙⵎⴷⵉ ⵏ ⵉⴹⵉⵏ ⵢⴰⵜⵜⵓⵢⵏ ⵉⵜⵜⵓⵎⵍⴰⵏ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴱⵕⵍⴰⵎⴰⵏⵉⵜ ⵏ ⵜⵎⴰⵡⴰⵏⵜ ⵏ 2019, ⵎⵏⵏⴰⵡ ⵏ ⵉⵙⵡⵓⴷⴷⵓⵏ ⵉⵔⴰⵏ ⴰⴷ ⵙⵔⵙⵏ ⵢⴰⵏ ⵓⵎⵉⴽⴰⵏⵉⵣⵎ ⵏ ⵓⵍⵍⴰⵙ ⵏ ⵓⵥⵕⴼ ⵓⵔ ⵉⴱⵉⴷⴷⵏ ⵙⴳ ⴱⴰⵏⴽ ⵍⵎⵖⵔⵉⴱ ⵉ ⴰⴽⴽⵯ ⵉⵕⵟⵟⴰⵍⵏ ⵉⴱⴰⵏⴽⵉⵏ ⵉⵜⵜⵓⴼⴽⴰⵏ ⵏ ⵉⵙⵎⵉⵍⵏ ⵉⵍⵍⴰⵏ ⴳ ⵉⵏⴰⵡ ⴰⴷ.
ⵉⴳⴰ ⵙⵓⵍ ⵍⵃⴰⵍ ⴰⵣⵣⵉⴳⵔ ⵏ ⵓⵙⵖⵏ ⵉⵣⴰⵢⴷⵏ ⵙ 1.25% ⴳ ⵓⵙⴰⵜⵉ ⵏ ⵓⵍⵍⴰⵙ ⵏ ⵓⵥⵕⴼ ⵍⵍⵉ ⴼⴽⴰⵏ ⵉⴱⴰⵏⴽⵏ ⵉ ⵢⵙⵎⵍⵏ ⵍⵍⵉ ⵎⵓ ⵢⴳⴰ ⵡⵙⵖⵏ ⴰⴷ, ⵎⴰ ⵢⴰⴷ ⵉⴳⴰⵏ 100 ⵜⵏⵇⵇⵉⴹⵜ ⴷⴷⵓ ⵏ ⵓⵜⵉⴳ ⵏ ⴱⴰⵏⴽ ⵍⵎⵖⵔⵉⴱ.
ⴳ ⵢⴰⵜ ⵜⵙⴳⵓⵔⵉ ⵢⴰⴹⵏⵉⵏ, ⵉⵏⵏⴰ ⵡⵏⵙⵙⵉⵅⴼ ⵏ ⵓⴳⵔⴰⵡ ⴰⵣⵣⵓⵍⴰⵏ ⵏ ⵉⴱⵏⴰⴽⵏ ⵏ ⵍⵎⵖⵔⵉⴱ, ⵎⴰⵙⵙ ⵄⵜⵎⴰⵏ ⴱⵏⵊⵍⵍⵓⵏ, ⵎⴰⵙ ⵉⴳⵔ ⴰⴱⴰⵏⴽⵉ ⵉⵙⵖⵏ ⴰⴷ ⵉⴷⵔⵓ ⵙ 3 ⵏ ⵓⵎⵍⵢⴰⵕ ⵏ ⴷⴷⵔⵀⵎ, ⵙ ⵓⵙⵖⵍ ⵉⵙⵡⴰⵏ ⴷ ⵡⴰⵏⵏ ⵏ ⵜⵏⴱⴰⴹⵜ ⴷ ⴱⴰⵏⴽ ⵍⵎⵖⵔⵉⴱ, ⴳ ⵓⵥⵕⴼ ⵏ ⵜⴼⵏⵉⵇⵜ ⴰⴷ.
ⴷⴼⴼⵉⵔ ⴰⴷ, ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ, ⴰⴷ ⵜ ⵉⵃⴼⴹ ⵕⴱⴱⵉ, ⵜⴰⴼⵓⴳⵍⴰ ⵏ ⵓⵙⴳⵎⴹ ⵅⴼ ⴽⵕⴰⴹ ⵏ ⵜⵎⵢⵢⴰⵇⴰⵏⵉⵏ ⵉⵥⵍⵉⵏ ⵙ ⵓⵣⵣⵉⴳⵔ ⵏ ⵓⵖⴰⵡⴰⵙ ⵉⵙⵉⴷⴼⵏ ⵏ ⵓⵥⵕⴼ ⵏ ⵜⵎⵙⵙⵏⵜⵉⵏ.
ⵜⵙⵎⴰⵏ ⵜⵏⵜⴰⵎⵜ ⵜⴰⵎⵣⵡⴰⵔⵓⵜ ⴳⵔ ⵜⵎⴰⵡⴰⵙⵜ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⴷ ⴱⴰⵏⴽ ⵍⵎⵖⵔⵉⴱ, ⴷ ⵓⴳⵔⴰⵡ ⴰⵣⵣⵓⵍⴰⵏ ⵏ ⵉⴱⵏⴰⴽⵏ ⵏ ⵍⵎⵖⵔⵉⴱ ⴷ ⵓⵥⵕⴼ ⵏ ⵜⵎⵙⵙⵏⵜⵉⵏ, ⵉⵙⴳⵎⴹ ⵖⴼⵙ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⴰⵙⴳⴷ ⵏ ⵜⵎⵙⵙⵓⴳⵓⵔⵜ, ⴷ ⵍⵡⴰⵍⵉ ⵏ ⴱⴰⵏⴽ ⵍⵎⵖⵔⵉⴱ, ⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⴰⵣⵣⵓⵍⴰⵏ ⵏ ⵉⴱⵏⴰⴽⵏ ⵏ ⵍⵎⵖⵔⵉⴱ.
ⵜⵏⵜⴰⵎⵜ ⵜⵉⵙⵙ ⵙⵏⴰⵜ ⵜⴳⴳⵔ ⵉ ⵡⵣⴷⴷⵓⵢ ⵏ ⵜⵎⵀⵍⵉⵡⵉⵏ ⵏ ⵓⵏⵏⴰⵍ ⴷ ⵓⵎⵓⵏ ⴷ ⵓⴽⴷ ⵏ ⵜⵎⵙⵙⵏⵜⵉⵏ ⴳ ⵓⵙⵡⵉⵔ ⵏ ⵜⵎⵏⴰⴹⵉⵏ, ⴷ ⵜⵜⵓⵙⴳⵎⴰⴹ ⵙⴳ ⵎⴰⵙⵙ ⵄⴱⴷ ⵍⵡⴰⴼⵉ ⵍⴼⵜⵉⵜ, ⴰⵎⴰⵡⵙⴰⵙ ⵏ ⵓⴳⵏⵙⵓ, ⴷ ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵎⴰⵙⵙ ⵄⴱⴷⵍⵍⵟⵉⴼ ⵊⵊⵡⴰⵀⵔⵉ, ⴷ ⵎⴰⵙⵙ ⵄⵜⵎⴰⵏ ⴱⵏ ⵊⵍⵍⵓⵏ, ⴷ ⵓⵏⵙⵙⵉⵅⴼ ⵏ ⵜⵎⵓⵏⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵏⵜⵉⵏ ⵏ ⵍⵎⵖⵔⵉⴱ, ⵛⴰⴽⵉⴱ ⵍⵄⵍⵊ, ⴷ ⵜⵎⵀⴰⵍⵜ ⵜⴰⵎⴰⵜⴰⵢⵜ ⵏ ⵓⵙⵉⵔⴰ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴷ ⵜⵏⴽⵔⴰ ⵙ ⵜⵡⵓⵔⵉ, ⵎⴰⵙⵙⴰ ⵍⵓⴱⵏⴰ ⵟⵕⵉⵛⴰ.
ⵜⵏⵜⴰⵎⵜ ⵜⵉⵙⵙ ⴽⵕⴰⴹ ⵜⴳⴰ ⵢⴰⵜ ⵜⵎⵢⴰⵇⵇⴰⵏⵜ ⵏ ⵜⴷⵔⴰⵡⵜ ⴳⵔ ⵓⵕⵟⵟⴰⵍ ⴰⵏⴼⵍⴰⵃ ⵏ ⵍⵎⵖⵔⵉⴱ ⴷ ⵍⴱⴰⵔⵉⴷ ⴱⴰⵏⴽ, ⵜⵥⵍⵉ ⵙ ⵉⵙⵉⴷⴼ ⴰⵥⵕⴼⴰⵏ ⵏ ⵉⵎⵣⴷⴰⵖⵏ ⵉⴼⵔⴰⵏⵉⵏ, ⵙⴳⵎⴹⵏ ⵖⴼⵙ ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵎⴰⵙⵙ ⵄⴱⴷⵍⵍⵟⵉⴼ ⵊⵊⵡⴰⵀⵔⵉ, ⴷ ⵎⴰⵙⵙ ⵟⴰⵕⵉⵇ ⵙⵙⵉⵊⵉⵍⵎⴰⵙⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵓⵕⵟⵟⴰⵍ ⴰⵏⴼⵍⴰⵃ ⵏ ⵍⵎⵖⵔⵉⴱ, ⴷ ⵎⴰⵙⵙ ⵏⴰⵊⵎ ⴷⴷⵉⵏ ⵕⴹⵡⴰⵏ, ⴰⵏⵙⵙⵉⵅⴼ ⵏ ⵜⵎⵙⵙⵓⴳⵓⵔⵜ ⵏ ⵍⴱⴰⵔⵉⴷ ⴱⴰⵏⴽ.
ⵃⴰⴹⵕⵏ ⴳ ⵜⴼⵓⴳⵍⴰ ⵢⴰⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⴷ ⵉⵎⵛⵛⵉⵡⴰⵔ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴷ ⵉⴳⵎⴰⵎⵏ ⵏ ⵜⵏⴱⴰⴹⵜ.