ⵉⵍⵓⵍ ⴱⵍⵄⵉⴷ ⵍⵄⴽⴽⴰⴼ ⴳ ⵕⵕⴱⴰⵟ ⴳ 1952 ⴳ ⵢⴰⵜ ⵜⵡⴰⵛⵓⵏⵜ ⵉⵏⴽⵔⵏ ⴰⵎⵎⴰⵙ ⵏ ⵉⵖⵏⵏⵉⵊⵏ ⵏ ⵓⵃⵡⴰⵛ, ⴰⵛⴽⵓ ⵢⴳⴰ ⴱⴰⴱⴰ ⵜ ⵏ ⵎⴰⵙⵙ ⴱⵍⵄⵉⴷ ⵕⵕⴰⵢⵚ.
ⵍⵍⵉⵖ ⵙⵓⵍ ⵉⵎⵥⵥⵉ, ⵉⴽⵛⵎ ⴱⵍⵄⵉⴷ ⵍⵄⴽⴽⴰⴼ ⵙ ⵓⵙⵉⵏⴰⴳ ⵏ ⵓⵥⴰⵡⴰⵏ ⵏ ⵕⵕⴱⴰⵟ ⴳ 1963, ⴷ ⵉⵥⴹⴰⵕ ⴰⴷ ⴳⵉⵜ ⵢⴰⵎⵥ ⴰⴷⵉⴱⵍⵓⵎ ⵏⵏⵙ ⵓⵍⴰ ⴰⴷ ⴳⵉⵜ ⵉⵙⵙⴰⵇⵕⴰ.
ⴷⴼⴼⵉⵔ ⵍⵍⵉⵖ ⵢⵓⵎⵥ ⴰⴷⵉⴱⵍⵓⵎ ⴰⴷ, ⵉⴽⵛⵎ ⵎⴰⵙⵙ ⴱⵍⵄⵉⴷ ⵙ ⵢⴰⵜ ⵜⵔⴰⴱⴱⵓⵜ ⵍⵍⵉ ⵢⵙⵏⴼⵍⵏ ⴱⴰⵀⵔⴰ ⴰⵖⵏⵏⵉⵊ ⴰⵎⴰⵣⵉⵖ ⴳ ⵉⵙⴳⴳⵯⴰⵙⵏ ⵏ 1970, ⵎⴰ ⵢⴰⴷ ⵉⴳⴰⵏ ⵜⴰⵔⴰⴱⴱⵓⵜ "ⵓⵙⵎⴰⵏ".
ⴳ ⵢⴰⵏ ⵓⵎⵙⵏⴰⵍⴰ ⴷ ⵜⴰⴳⴳⵓⵔⵜ ⵜⴰⵎⴰⵣⵉⵖⵜ ⵏ ⵜⵙⵏⵓⵕⴰⵢⵜ ⵜⵎⵖⵔⴰⴱⵉⵜ ⵏ ⵉⵏⵖⵎⵉⵙⵏ (ⵍⴰⵎⴰⴱ), ⵉⵏⵏⴰ ⵎⴰⵙⵙ ⵍⵄⴽⴽⴰⴼ ⵎⴰⵙ ⵉⴳⵍⵍⵉⵏ ⴱⵕⴰⵀⵉⵎ ⴰⵅⵢⵢⴰⵟ ⴰⴷ ⵉⵙⵎⴰⵏⵏ ⵉⴳⵎⴰⵎⵏ ⵏ ⵜⵔⴰⴱⴱⵓⵜ "ⵓⵙⵎⴰⵏ" ⴰⴼ ⴰⴷ ⵖⵏⵏⵊⵏ ⵜⴰⵎⴷⵢⴰⵣⵜ ⵍⵍⵉ ⴰⵔ ⵜⵜⵢⴰⵔⴰⵏ ⵉⵎⴷⵢⴰⵣⵏ ⵏ ⵜⵎⵓⵏⵜ ⵜⵎⵖⵔⴰⴱⵉⵜ ⵏ ⵓⵙⵉⴳⴳⵍ ⴷ ⵏ ⵓⵙⵏⴼⵍ ⴰⴷⵍⵙⴰⵏ (ⴰⵎⵕⵉⴽ), ⵎⴰ ⵢⴰⴷ ⵉⴳⴰⵏ ⵜⴰⵎⵙⵎⵓⵏⵜ ⵜⴰⵎⴰⵣⵉⵖⵜ ⵜⴰⵎⵣⵡⴰⵔⵓⵜ ⴳ ⵍⵎⵖⵔⵉⴱ.
ⵉⵔⵏⴰ ⵢⵏⵏⴰ ⵎⴰⵙⵙ ⵍⵄⴽⴽⴰⴼ ⵎⴰⵙ ⵉⵣⵣⵔⵉ ⵢⴳⵍⵍⵉⵏ ⴱⵕⴰⵀⵉⵎ ⴰⵅⵢⵢⴰⵟ ⵎⵏⵏⴰⵡ ⵏ ⵉⵢⵢⵉⵔⵏ ⴰⵔ ⵉⵙⵉⴳⴳⵉⵍ ⵉⵏⴰⵥⵓⵕⵏ ⵉⵙⵓⵙⵉⵏ ⵉⵄⵔⵔⵉⵎⵏ, ⴰⵔ ⵍⵍⵉⵖ ⵜⵏ ⵉⵙⵎⴰⵏ. ⴼ ⵖⵉⴽⴰⵏⵏ, ⵜⵙⵎⴰⵏ ⵜⵔⴰⴱⴱⵓⵜ « ⵓⵙⵎⴰⵏ » ⵚⴹⵉⵚ ⵏ ⵉⴳⵎⴰⵎⵏ, ⵎⴰ ⵢⴰⴷ ⵉⴳⴰⵏ ⵉⴳⵍⵍⵉⵏ ⵄⵎⵎⵓⵕⵉ ⵎⴱⴰⵕⴽ, ⴷ ⴱⵍⵄⵉⴷ ⵍⵄⴽⴽⴰⴼ, ⴷ ⵙⴰⵄⵉⴷ ⴱⵉⵊⵄⴰⴹ, ⴷ ⵙⴰⵄⵉⴷ ⴱⵓⵜⵔⵓⴼⵉⵏ, ⴷ ⵍⵢⴰⵣⵉⴷ ⵍⵇⵕⴼⵉ, ⴷ ⵟⴰⵕⵉⵇ ⵎⵄⵕⵓⴼⵉ.
ⵓⵊⵊⴰⵏ ⵉⵏⴰⵥⵓⵕⵏ ⵉⵅⴰⵜⴰⵔⵏ ⴰⴷ, ⵙⴳ 1974 ⴰⵔ 1983, ⵎⵏⵏⴰⵡ ⵏ ⵉⵖⵏⵏⵉⵏ ⵉⴼⵓⵍⴽⵉⵏ ⵉⵟⵟⴰⴼⵏ ⵍⵎⵄⵏⴰ ⵉⵅⴰⵜⴰⵔⴰⵏ ⵍⵍⵉ ⵡⵔⴰⵏ ⵉⵎⴷⵢⴰⵣⵏ ⵉⵎⵇⵕⴰⵏⵏ ⵏ "ⴰⵎⵕⵉⴽ", ⵣⵓⵏⴷ "ⵜⴰⴽⵏⴷⴰⵡⵜ" ⴷ "ⵜⵉⵍⵍⴰⵙ" ⴷ "ⵉⴷⵔⴰⵔⵏ" ⴷ "ⵜⴰⴱⵔⴰⵜⵜ", ⴷ ⵥⴹⴰⵕⵏ ⴰⴷ ⵍⴽⵎⵏ ⴰⵔ ⵓⵎⵣⴳⵓⵏ ⵉⵜⵓⵙⵙⴰⵏⵏ ⵏ "ⵍⵓⵍⴰⵎⴱⵢⴰ" ⴳ ⴱⴰⵔⵉⵣ ⴳ 1977.
"ⵎⵇⵇⴰⵕ ⵍⵍⵉⵖ ⴰⵔ ⵏⵜⵔⴰⵔ ⴰⵥⴰⵡⴰⵏ ⵏⵏⵖ ⵙ ⵉⵍⵍⴰⵍⵏ ⵏ ⵜⴳⵓⵜ, ⵣⵓⵏⴷ ⵜⴰⵍⴳⵉⵜⴰⵔⵜ ⵜⴰⵥⵥⴰⵕⵓⵕⵜ, ⴰⵔ ⵏⵜⵔⴰⵔ ⵜⴰⵎⴷⵢⴰⵣⵜ ⵍⵍⵉ ⴰⵔ ⵢⴰⴷ ⵍⵍⵉ ⵜⵜⴰⵔⴰⵏ ⵉⵎⴷⵢⴰⵣⵏ ⵉⵎⵇⵕⴰⵏ, ⵣⵓⵏⴷ ⵉⴳⵍⵍⵉⵏ ⵄⵍⵉ ⵙⵉⴷⵇⵉ ⴰⵣⴰⵢⴽⵓ, ⴷ ⵎⵓⵃⵎⵎⴷ ⵎⵙⵜⴰⵡⵉ, ⴷ ⵄⵓⵎⴰⵕ ⴰⵎⴰⵔⵉⵔ, ⴷ ⵉⴳⵍⵍⵉⵏ ⵎⵓⵃⵎⵎⴷ ⵍⵊⵉⵛⵜⵉⵎⵉ, ⴷ ⵉⴳⵍⵍⵉⵏ ⴱⵕⴰⵀⵉⵎ ⴰⵅⵢⵢⴰⵟ", ⵎⴰ ⵢⴰⴷ ⵉⵏⵏⴰ ⴱⵍⵄⵉⴷ ⵍⵄⴽⴽⴰⴼ.
ⴷⴼⴼⵉⵔ ⵍⵍⵉⵖ ⵜⴱⴹⴰ "ⵓⵙⵎⴰⵏ", ⵉⴷⴷⴰ ⴱⵍⵄⵉⴷ ⵍⵄⴽⴽⴰⴼ ⵙ ⵜⵎⵓⵏⵜ ⵜⴰⵙⵓⴼⵢⵉⵜⵉⵜ ⵍⵍⵉⵖ ⵉⵖⵕⴰ, ⴳ ⵓⵙⵉⵏⴰⴳ ⴰⵏⴰⴼⵍⵍⴰ ⵏ ⵓⵥⴰⵡⴰⵏ "ⵜⵛⴰⵢⴽⵓⴼⵙⴽⵉ" ⴳ ⴽⵢⵉⴼ, ⴰⵙⵏⴰⵢ ⴰⵥⵥⵓⴳⵏⴰ ⵙⴳ 1982 ⴰⵔ 1985, ⴷⴰⵜ ⴰⴷ ⵉⴳⵔⴰⵡⵍ ⵙ ⵍⵎⵖⵔⵉⴱ ⴳ 1986.
ⵉⴽⵯⵜⴰ ⵎⴰⵙⵙ ⵍⵄⴽⴽⴰⴼ ⵡⵙⵙⴰⵏ ⵍⵍⵉ ⵢⵣⵣⵔⵉ ⴳ ⴽⵢⵉⴼ. "ⴰⵔ ⵢⴰⴷ ⵍⵍⵉ ⵏⴰⵇⵇⵕⴰ ⵎⵔⴰⵡ ⵏ ⵜⵙⵔⴰⴳⵉⵏ ⴽⵔⴰ ⵢⴳⴰⵜⵜ ⴰⵙⵙ. ⵖⵕⵉⵖ ⵎⵔⴰⵡ ⵏ ⵜⵎⵜⵜⵉⵏ ⵜⵉⵥⴰⵡⴰⵏⵉⵏ, ⵍⵍⴰⵏ ⴳⵉⵜⵙⵏ ⵎⵏⵏⴰⵡ ⵏ ⵜⵙⵔⴰⴳⵉⵏ ⵍⵍⵉ ⵓⵔⵜⴰ ⵍⵍⴰⵏⵜ ⴳ ⵍⵎⵖⵔⵉⴱ, ⵣⵓⵏⴷ ⵜⵎⵀⵍⴰ ⵏ ⵍⵓⵕⴽⵉⵚⵟⵕⴰ ⴷ ⵓⵙⵏⴰⵢ", ⵎⴰ ⵢⴰⴷ ⵉⵏⵏⴰ.
ⵙ ⵢⴰⵏ ⵓⴼⵔⴰⵢ ⵉⵕⵖⴰⵏ, ⵉⴽⵯⵜⴰ ⵡⵏⴰⵥⵓⵕ ⵉⵙⵎⴰⵡⵏ ⵏ ⵉⵙⵍⵎⴰⴷⵏ ⵉⵣⵔⵉⵏ ⵏⵏⵙ, ⵉⴼⵔⴰ ⵢⵏⵏⴰ ⵉⵙ ⴷⴰⵔⵜ ⵓⵊⵊⴰⵏ ⵢⴰⵏ ⵜⵎⴰⵜⴰⵔⵜ ⵉⴼⵓⵍⴽⵉⵏ ⴳ ⵉⴳⵔ ⴰⵥⴰⵡⴰⵏ ⵓⵍⴰ ⴰⴼⴳⴰⵏ. "ⴰⵔ ⴰⵏⵖ ⴰⵇⵇⵕⴰⵏ ⵙ ⵜⴳⵎⵎⴰ ⵏⵏⵙⵏ ⴰⴼ ⴰⴷ ⴰⵏⵖ ⴳⵉⵜⵏ ⵙⵙⵍⵎⴰⴷⵏ ⵅⴼ ⵓⵥⴰⵡⴰⵏ", ⵎⴰ ⵢⴰⴷ ⵉⵔⵏⴰ ⵢⵏⵏⴰ.
ⴷⴼⴼⵉⵔ ⵍⵍⵉⵖ ⵢⵓⴹⴰ ⵙ ⵍⵎⵖⵔⵉⴱ, ⵉⴹⴼⴰⵕ ⴱⵍⵄⵉⴷ ⵍⵄⴽⴽⴰⴼ ⵢⴰⵜ ⵜⵖⴰⵔⴰⵙⵜ ⵜⴰⵣⵓⵍⴰⵏⵜ ⵉⴼⵓⵍⴽⵉⵏ ⴳ ⵉⴳⵔ ⵏ ⵓⵙⵍⵎⴷ ⴷ ⵜⵓⴳⵉ ⵜⴰⵏⴰⵥⵓⵕⵜ, ⴷ ⵢⵉⵡⵉ ⵎⵏⵏⴰⵡ ⵏ ⵜⵙⵎⵖⵓⵔⵉⵡⵉⵏ ⴳ ⵓⴳⵏⵙ ⵓⵍⴰ ⴱⵕⵕⴰ ⵏ ⵍⵎⵖⵔⵉⴱ.
ⵎⴰⵛ ⵔⴰⴷ ⴱⴷⴷⴰ ⵢⵣⴷⵉ ⵉⵙⵎ ⵏ ⴱⵍⵄⵉⴷ ⵍⵄⴽⴽⴰⴼ ⴷ ⵡⵉⵏ ⵏ ⵓⴳⵔⴰⵡ "ⵓⵙⵎⴰⵏ", ⵍⵍⵉ ⵢⵥⵍⵉⵏ ⵉⴹⵕⵉⵚⵏ ⵉⴷⴷⵓⵔⵏ ⵏ ⵜⵎⴷⵢⴰⵣⵜ ⵉⵙⴰⵡⵍⵏ ⵅⴼ ⵉⵥⵓⵕⴰⵏ ⵉⵎⴰⵣⵉⵖⵏ ⵏ ⵜⵎⴰⵣⵉⵔⵜ ⵏⵏⵖ.