ⵉⴳⴰ ⵡⵙⵏⵜⵉ ⴰⴳⵍⴷⴰⵏ ⴰⴷ ⵉ ⵢⵏⴼⵍⴰⵃⵏ ⴷ ⴰⵢⵜ ⵚⵚⵏⵉⵄⵜ ⴷ ⵉⵙⴱⴱⴰⴱⵏ ⴷ ⵉⵣⵣⵓⵍⴰⵏ ⵉⵙⵉⵎⴰⵏⵏ ⵉⴹⴼⴰⵕⵏ ⵉ ⵓⵏⴱⵉⴹ ⴰⵣⵣⵓⵍⴰⵏ ⴰⵎⵢⵉⵡⵏ, ⵓⵍⴰ ⵓⵏⴱⵉⴹ ⵏ ⵓⵎⵙⵙⵏⵜⵉ ⵙ ⵉⵅⴼ ⵏⵏⵙ, ⴷ ⵓⵏⴱⵉⴹ ⵏ ⵜⵎⵙⵙⵉⴹⵏⵜ. ⵔⴰⴷ ⵉⵃⴱⵓ ⵓⵙⵏⵜⵉ ⵢⴰⴷ ⴷⴼⴼⵉⵔ ⵏ ⵖⵉⴽⴰⵏⵏ, ⵎⵏⵏⴰⵡ ⵏ ⵉⵙⵎⵉⵍⵏ ⴰⴼ ⴰⴷ ⵉⵙⵙⵍⴽⵎ ⵓⴼⵔⴰⴳ ⴰⵏⴰⵎⵓⵏ ⵉ ⴰⴽⴽⵯ ⵉⵏⴰⵎⵓⵔⵏ.
ⵉⵏⵏⴰ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ ⴰⴷ ⵉⴳⴰⵏ, ⵍⵍⵉ ⵢⵖⵕⴰⵏ ⵢⴰⵜ ⵜⴳⵓⵔⵉ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ, ⵎⴰⵙ ⵓⵙⵏⵜⵉ ⵢⴰⴷ ⵉⵔⴰ ⴰⴷ ⵉⵃⵟⵟⵓ ⵍⴽⴰⵕⴰⵎⴰ ⵏ ⵉⵎⵖⵔⴰⴱⵉⵢⵏ ⴷ ⵉⵏⵏⵍ ⵜⵉⵥⵉⴹⵕⴰ ⵏ ⵜⵎⵙⵖⵉⵡⵜ ⵏⵏⵙⵏ ⴷ ⵓⵙⵙⴽⵛⵎ ⵏ ⵉⴳⵔ ⵓⵔ ⵉⵍⵖⴰⵏ.
"ⴰⵔ ⵓⵙⴳⴳⵯⴰⵙ ⵏ 2025, ⵔⴰⴷ ⵉⵅⵚⵚⵓ ⵉ ⵓⵙⵡⵓⴷⴷⵓ ⵏ ⵉⵖⴰⵡⴰⵙⵏ 51 ⵓⵎⵍⵢⴰⵕ ⵏ ⴷⴷⵔⵀⵎ, 23 ⵓⵎⵍⵢⴰⵕ ⵍⵍⵉ ⵔⴰⴷ ⵜⵥⵕⴼ ⵜⵎⵙⴰⵙⵜⵍⵜⵜ ⴰⵎⴰⵜⴰⵢⵜ ⵏ ⵓⵡⴰⵏⴽ", ⵎⴰ ⵢⴰⴷ ⵉⵏⵏⴰ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ.
ⴳ ⵓⵣⵎⵣⵣⵓ ⵢⴰⴷ, ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⴳⵎⴹ ⵏ ⴽⵕⴰⴹ ⵜⵎⵢⴰⵇⵇⴰⵏⵉⵏ ⵜⵉⵙⴰⵜⵉⵏ ⵉⴳⴳⵔⵏ ⵉ ⵜⵙⵎⴰⵜⴰⵢⵜ ⵏ ⵓⵙⴼⵍⵙ ⵉⵣⵓⵛⵛⵍⵏ ⵅⴼ ⵜⵎⴰⴹⵓⵏⵜ ⵉ ⵢⵣⵣⵓⵍⴰⵏ ⴷ ⵉⵎⵡⵡⵓⵔⵉⵏ ⵉⵙⵉⵎⴰⵏⵏ ⴷ ⵎⴷⴷⵏ ⵓⵔ ⵉⵎⵎⵡⵓⵔⵉⵏ ⵉⵙⴽⴰⵔⵏ ⵜⵡⵡⵓⵔⵉ ⵜⵓⵙⵍⵉⴳⵜ.
ⵜⴰⵎⵢⴰⵇⵇⴰⵏⵜ ⵜⴰⵙⵉⵏⴰⵜ ⵉⵣⵡⴰⵔⵏ ⵜⴳⴳⵔ ⵉ ⵜⵙⵎⴰⵜⴰⵢⵜ ⵏ ⵓⵙⴼⵍⵙ ⵉⵣⵓⵛⵛⵍⵏ ⵅⴼ ⵜⵎⴰⴹⵓⵏⵜ ⵉ ⵢⵙⴱⴱⴰⴱⵏ ⴷ ⵉⵏⵎⵏⴰⴹⵏ ⴷ ⵉⵣⵣⵓⵍⴰⵏ ⵉⵙⵉⵎⴰⵏⵏ ⵉⴹⴼⴰⵕⵏ ⵉ ⵓⵏⴱⵉⴹ ⴰⵣⵣⵓⵍⴰⵏ ⴰⵎⵢⵉⵡⵏ, ⴷ ⵓⵏⴱⵉⴹ ⵏ ⵓⵎⵙⵙⵏⵜⵉ ⵙ ⵉⵅⴼ ⵏⵏⵙ, ⵍⵍⵉ ⵢⵙⵎⴰⵏⵏ ⵓⴳⴳⴰⵔ ⵏ 800.000 ⵓⵎⴹⴼⴰⵕ.
ⵙⴳⵎⴹⵏ ⵅⴼ ⵜⵎⵢⴰⵇⵇⴰⵏⵜ ⴰⴷ ⵎⴰⵙⵙ ⵄⴱⴷⵍⵡⴰⵃⴷ ⵍⴼⵜⵉⵜ, ⴰⵎⴰⵡⵙⴰⵙ ⵏ ⵓⴳⵏⵙⵓ, ⴷ ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⴷ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴰⵎⴰⵡⵙⴰⵙ ⵏ ⵜⴷⵓⵙⵉ, ⴷ ⵎⵓⵍⴰⵢ ⵃⴼⵉⴷ ⵍⵄⴰⵍⴰⵡⵉ, ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵓⵙⵙⴰⵔⵓ ⴷ ⵜⵙⴱⴱⴰⴱⵜ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⴰⵎⵓⵟⵟⵓⵏⵜ, ⴷ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⵄⴰⵍⴰⵡⵉ, ⵜⴰⵎⴰⵡⴰⵙⵜ ⵏ ⵜⵎⴰⵍⴰⵢⵜ ⴷ ⵜⵏⵉⴹⵉ ⴷ ⵓⵙⵙⴰⵢ ⴰⵡⵏⴰⴹ ⴷ ⵜⴷⵎⵙⴰ ⵜⴰⵏⴰⵎⵓⵏⵜ, ⴷ ⵎⴰⵙⵙ ⵎⵓⵃⵎⵎⴷ ⴰⵎⴽⵔⴰⵣ, ⴰⵎⴰⵡⵙⴰⵙ ⵏ ⵜⵡⵓⵔⵉ ⴷ ⵉⵙⴷⴼ ⴰⵣⵣⵓⵍⴰⵏ, ⴷ ⵎⴰⵙⵙ ⵛⴰⴽⵉⴱ ⵄⵍⵊ, ⴰⵏⵙⵙⵉⵅⴼ ⵏ ⵜⴰⴹⴰ ⵜⴰⵎⴰⵜⴰⵢⵜ ⵏ ⵜⵎⵙⵙⵏⵜⵉⵏ ⵏ ⵍⵎⵖⵔⵉⴱ, ⴷ ⵎⴰⵙⵙ ⵃⵓⵙⵉⵏ ⵄⵍⵉⵡⴰ, ⴰⵏⵙⵙⵉⵅⴼ ⴰⵎⵣⵡⴰⵔⵓ ⵏ ⵜⴼⵉⴹⵉⵕⴰⵍⵉⵜ ⵏ ⵉⵙⵇⵇⵉⵎⵏ ⵏ ⵜⵙⴱⴱⴰⴱⵜ ⴷ ⵏ ⵜⵎⴳⵓⵔⵉ ⴷ ⵜⵏⴰⴼⵓⵜⵉⵏ, ⴷ ⵎⴰⵙⵙ ⵙⵉⴷⴰⵜⵉ ⵛⴳⴳⴰⴼ, ⴰⵏⵙⵙⵉⵅⴼ ⵏ ⵜⴼⵉⴹⵉⵕⴰⵍⵉⵜ ⵏ ⵉⵙⵇⵇⵉⵎⵏ ⵏ ⵜⵏⵉⴹⵉ.
ⵜⴰⵎⵢⴰⵇⵇⴰⵏⵜ ⵜⵉⵙⵙ ⵙⵏⴰⵜ ⵜⴳⴳⵔ ⵉ ⵜⵙⵎⴰⵜⴰⵢⵜ ⵏ ⵓⵙⴼⵍⵙ ⵉⵣⵓⵛⵛⵍⵏ ⵅⴼ ⵜⵎⴰⴹⵓⵏⵜ ⵉ ⵢⵣⵣⵓⵍⴰⵏ ⵏ ⵜⵏⵉⴹⵉ (ⵍⴰⵃⵡⴰⵍ ⵏ 500.000 ⵓⵎⴹⴼⴰⵕ). ⵙⴳⵎⴹⵏ ⵜ ⵎⴰⵙⵙ ⵄⴱⴷⵍⵡⴰⵃⴷ ⵍⴼⵜⵉⵜ, ⴷ ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴷ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⵄⴰⵍⴰⵡⵉ, ⴷ ⵎⴰⵙⵙ ⵎⵓⵃⵎⵎⴷ ⴰⵎⴽⵔⴰⵣ, ⴷ ⵎⴰⵙⵙ ⵛⴰⴽⵉⴱ ⵄⵍⵊ, ⴷ ⵎⴰⵙⵙ ⵙⵉⴷⴰⵜⵉ ⵛⴳⴳⴰⴼ.
ⵜⴰⵎⵢⴰⵇⵇⴰⵏⵜ ⵜⵉⵙⵙ ⴽⵕⴰⴹ ⵜⴳⴳⵔ ⵉ ⵜⵙⵎⴰⵜⴰⵢⵜ ⵏ ⵓⵙⴼⵍⵙ ⵉⵣⵓⵛⵛⵍⵏ ⵅⴼ ⵜⵎⴰⴹⵓⵏⵜ ⵉ ⵢⵏⴼⵍⴰⵃⵏ (ⵍⴰⵃⵡⴰⵍ ⵏ 1.6 ⵓⵎⵍⵢⵓⵏ ⵏ ⵉⵎⴹⴼⴰⵕⵏ), ⴷ ⵙⴳⵎⴹⵏ ⵜ ⵎⴰⵙⵙ ⵄⴱⴷⵍⵡⴰⵃⴷ ⵍⴼⵜⵉⵜ, ⴷ ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⵍⴰⵏⵜ ⴷ ⵜⵉⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵜ, ⴷ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴷ ⵎⴰⵙⵙ ⵎⵓⵃⵎⵎⴷ ⴰⵎⴽⵔⴰⵣ, ⴷ ⵎⴰⵙⵙ ⵛⴰⴽⵉⴱ ⵄⵍⵊ, ⴷ ⵎⴰⵙⵙ ⵍⵃⴱⵉⴱ ⴱⵏⵟⵟⴰⵍⴱ, ⴰⵏⵙⵙⵉⵅⴼ ⵏ ⵜⴼⵉⴹⵉⵕⴰⵍⵉⵜ ⵏ ⵉⵙⵇⵇⵉⵎⵏ ⵏ ⵜⵏⴼⵍⴰⵃⵜ, ⴷ ⵎⴰⵙⵙ ⵎⵓⵃⵎⵎⴷ ⵄⵎⵎⵓⵔⵉ, ⴰⵏⵙⵙⵉⵅⴼ ⵏ ⵜⴽⵓⵏⴼⵉⴹⵉⵕⴰⵍⵉⵜ ⵜⴰⵎⵖⵔⴰⴱⵉⵜ ⵏ ⵜⵏⴼⵍⴰⵃⵜ ⴷ ⵏ ⵜⴳⵎⵉ ⵜⴰⵏⴼⵍⴰⵃⵜ.
ⵉⵏⵏⴰ ⵙⵓⵍ ⵎⴰⵙⵙ ⴱⵏ ⵛⵄⴱⵓⵏ ⵎⴰⵙ ⴽⵕⴰⴹ ⵓⵎⵍⵢⵓⵏ ⵏ ⵉⵎⴹⴼⴰⵕⵏ ⴷ ⵜⵡⵊⵊⴰⵏⵉⵏ ⵏⵏⵙⵏ ⵔⴰⴷ ⵙⴱⵖⵔⵏ ⵙⴳ ⵓⵙⴼⵍⵙ ⵉⵣⵓⵛⵛⵍⵏ ⵅⴼ ⵜⵎⴰⴹⵓⵏⵜ, ⵎⴰ ⵔⴰⴷ ⵓⵙⵙⵍⴽⵎⵏ ⵎⴷⴷⵏ ⵍⵍⵉ ⵢⵃⴱⴰ ⵓⵙⴼⵍⵙ ⵍⴰⵃⵡⴰⵍ ⵏ 9 ⵓⵎⵍⵢⵓⵏ ⵏ ⵉⵏⴰⵎⵓⵔⵏ, ⵎⴰ ⵢⴰⴷ ⵉⴳⴰⵏ 83% ⵏ ⵎⴷⴷⵏ ⵉⵜⵡⴰⵜⵜⵙⵏ, ⵉⵔⵏⴰ ⵢⵏⵏⴰ ⵎⴰⵙⵙ ⵍⴰⵃⵡⴰⵍ ⵏ 22 ⵓⵎⵍⵢⵓⵏ ⵏ ⵉⵎⵙⴱⵖⵓⵔⵏ ⵢⴰⴹⵏⵉⵏ ⵔⴰⴷ ⴼⵔⵓⵏ ⴳ ⵉⵙⴳⴳⵯⴰⵙⵏ ⵏ 2021 ⴷ 2022.
ⵜⵣⵔⵉ ⵜⴼⵓⴳⵍⴰ ⵢⴰⴷ ⵙ ⵜⵉⵍⵉⵜ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ, ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵎⵓⵔⴰ, ⵎⴰⵙⵙ ⵍⵃⴱⵉⴱ ⵍⵎⴰⵍⴽⵉ, ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵉⵎⵛⵉⵡⴰⵕ, ⵎⴰⵙⵙ ⵃⴰⴽⵉⵎ ⴱⵏⵛⵎⵎⴰⵛ, ⴷ ⵉⵎⵛⵉⵡⴰⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵎⴰⵙⵙ ⴼⵓⴻⴰⴷ ⵄⴰⵍⵉ ⵍⵀⵉⵎⵎⴰ ⴷ ⵎⴰⵙⵙ ⵢⴰⵙⵉⵔ ⵥⵥⵏⴰⴳⵉ, ⴷ ⵉⴳⵎⴰⵎⵏ ⵏ ⵜⵏⴱⴰⴹⵜ, ⴷ ⵉⵙⵎⴷⵢⴰⵡⵏ ⵏ ⵉⵏⵎⴰⵍⵍⵓⵏ ⴰⴽⴽⵯ ⵉⵎⵇⵇⵓⵕⵏ, ⴷ ⵎⵏⵏⴰⵡ ⵏ ⵉⵎⵙⵜⴳⴳⴰⵔⵏ ⵢⴰⴹⵏⵉⵏ.