ⵉⵙⵎⴰⵍ ⵎⴰⵙⵙ ⴱⵏⵎⵓⵙⴰ ⴳ ⵓⵎⵔⴰⵔⴰ ⵏ ⵡⴰⵡⴰⵍ ⵏⵏⵙ ⴷ ⵉⵏⴰⵖⵎⴰⵙⵏ ⴳ ⵜⵉⵏⴰⵡⵜ ⵏ ⵓⵙⵇⵇⵉⵎ ⵓⵏⴱⵉⴹ ⵎⴰⵙ ⴰⵔ ⵉⵜⵜⵓⵙⴽⴰⵔ ⵖⵉⵍⴰⴷ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉ 330 ⵏ ⵉⴼⴹ ⵏ ⵡⴰⵣⵣⴰⵏ ⴳ 1660 ⵏ ⵜⵎⵔⵙⵍⵜ ⵏ ⵓⵙⵙⵍⵎⴷ ⴰⵎⵣⵡⴰⵔⵓ .
ⵉⵣⴰⵢⴷ ⵎⴰⵙⵙ ⴰⵎⴰⵡⵙⴰⵙ ⵉⵏⵏⴰ ⵎⴰⵙⴷ ⴰⵙⵙⵓⴳⵜ ⵏ ⵜⵎⵔⵙⴰⵍ ⵏ ⵓⵙⵙⵍⵎⴷ ⵉⵇⵇⴰⵏⴷ ⴰⴷ ⵉⵎⵓⵏ ⴷ ⵓⵙⴱⵓⵖⵍⵓ ⵏ ⵓⵟⵟⵓⵏ ⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⵙⵍⵎⴰⴷⵏ ⵢⴰⴹⵏ ⵏ ⵜⵓⵜⵍⴰⵢⵉⵏ ⵢⴰⴹⵏ ⴳ ⵓⵙⵏⵜⵉ ⵏ ⵉⵎⵉⵔ ⴰⵏⵎⵍⴰⵏ ⴷ ⵢⵓⵛⴽⴰⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵔⴰⴷ ⵉⵎⵎⴰⵜⵜⵉ ⵓⵟⵟⵓⵏ ⵙⴳ 200 ⴰⵔ 400 ⵏ ⵓⵙⵍⵎⴰⴷ ⵓⵥⵍⴰⵢ ⴽⵓⵏ ⴰⵙⴳⴳⵯⴰⵙ,ⴷ ⵓⵎⵎⵓⵜⵜⵉ ⵙⴳ 1500 ⴰⵔ 2000 ⵏ ⵓⵙⵍⵎⴰⴷ ⴳ ⵜⵓⵥⵍⴰⵢⵉⵏ ⵜⵉⵙⵉⵏⴰⵏⵉⵏ .
ⵉⵏⵏⴰ ⴰⵡⴷ ⵎⴰⵙ ⵔⴰⴷ ⵉⵜⵜⵓⵍⴽⴰⵎ ⵓⵣⴳⵏ ⵏ ⵓⴱⵔⵉⴷ ⴳ ⵓⵙⴳⴳⵯⴰⵙ ⵏ 2026 ⴰⴼⴰⴷ ⴰⴷ ⵏⴳⵓⵍⵓ ⴰⵡⵜⵜⴰⵙ ⵏ 4 ⵉⴷ ⵎⵍⵢⵓⵏ ⵏ ⵡⴰⵣⵣⴰⵏ ⴰⵎⵍⵎⴰⴷ, ⵎⴽⵍⵍⵉ ⵉⵏⵏⴰ ⵎⴰⵙⴷ ⵜⴰⵏⴱⴰⴷⵜ ⵜⵙⴽⵔ ⵢⴰⵜ ⵜⴽⴰⵕⴹⴰ ⵏ ⵓⴱⵔⵉⴷ ⴳ ⵎⴰⴷ ⵉⵣⵍⵉⵏ ⵙ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .
ⵔⴰⴷ ⵜⵙⵙⵏⵜⵉ ⵜⵎⴰⵡⵙⴰⵙⵜ ⴳ ⵉⵎⵉⵔ ⴰⴷ ⴷ ⵢⵓⵛⴽⴰⵏ ⴰⴼⴰⴷ ⴰⴷ ⵜⵙⴰⵜⵜⵓⵢ ⴰⵙⵙⵍⵎⴷ ⴳ ⵓⵙⵡⵉⵔ ⴰⵏⵎⵍⴰⵏ ⴰⵎⵣⵡⴰⵔⵓ, ⴰⴼⴰⴷ ⴰⴷ ⴰⴽⴽⵯ ⵜⴰⵎⵓ ⵉⵙⵡⵉⵔⵏ ⴳ 2029/2030 .
ⵉⴷⴷⴰⴷ ⵓⵙⵏⴼⴰⵕ ⴰⴷ ⵙ ⵓⵙⴽⴽⵉⵔ ⵏ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⵙⵍⴰⵡⴰⵏ ⴰⴽⴽⵯ ⴰⴳⵟⵟⵓⵎ ⵡⵉⵙⵙ ⵙⵎⵎⵓⵙ ⵏⵏⴰ ⵉⵙⴽⵔⵏ ⴳ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⵓⵏⵚⵉⴱⵜ ⴷ ⵜⵖⴹⴼⵜ ⵏⵏⴰ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵎⴰⵙ ⵜⴳⴰ ⴳ ⵜⵎⴰⴳⵉⵜ ⵜⴰⵎⵖⵔⵉⴱⵉⵜ ⵜⴰⴷⵙⵍⴰⵏⵜ ⴷ ⵎⴰⵙ ⵜⵜ ⴰⴽⴽ ⵛⵛⴰⵔⵏ ⵉⵎⵖⵔⵉⴱⵉⵏ ⵙ ⵓⵎⴰⵜⴰ .
ⵎⴽⵍⵍⵉ ⴷ ⵉⴷⴷⴰ ⵙ ⵓⵎⵙⴰⵙⴰ ⴷ ⵉⴹⵕⵉⵚⵏ ⵓⵏⴱⵉⴹⵏ ⴳ ⵎⴰⴷ ⵉⵥⵍⵉⵏ ⵙ ⵓⵙⴷⴷⵉⴷ ⴷ ⵓⵙⵏⵚⴱ ⵏ ⵜⵎⴰⵣⵉⵖⵜ ⴷ ⵉⵜⴳⴰⵔⵏ ⵏ ⵓⵙⵏⴼⴰⵕ ⵏ ⵓⵙⵍⴳⵏ ⵏ ⵓⵙⵙⵍⵎⴷ ⵓⵟⵟⵓⵏ 51.17 ⴷ ⵓⵣⵣⵓⴳⵯⵣ ⵏ ⵉⵡⵜⵜⴰⵙⵏ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵜⵓⵏⴱⵉⴹⵜ 2022-2026 .